Latexos de turismo - Ir a Inicio

Latexando con… Leo Lorenzo de Slow Food Compostela

«Bo, Limpo e Xusto para todos«, así define a asociación Slow Food Compostela a súa Presidenta

slow-food-compostela

Hai tempo que seguimos de preto a Slow Food Compostela e queremos compartir con vós a información sobre esta agrupación. Entrevistamos á súa presidenta, Leonor Lorenzo.

Somos unha asociación ecogastronómica que promove unha «nova gastronomía» entendida como expresión da identidade e a cultura. Defende o pracer vinculado ao alimento, reflexiona sobre a educación do gusto e o dereito ao goce cun novo sentido de responsabilidade, tendo en conta o equilibrio co ecosistema, a defensa da biodiversidade e o compromiso ético cos produtores.

Esta é básicamente a definición que atoparás en moitos sitios vinculados a nós.

  • Quen pode asociarse, cales son os requisitos, hai que pagar algunha cota?

Slow Food está aberto a toda persoa: a diversidade dos nosos socios é unha das nosas maiores forzas. Co carné persoal de Slow Food, cada asociado pode participar nos proxectos, nos eventos e nas actividades postas en marcha pola nosa Asociación e en 150 países do mundo.

Só grazas ao apoio de todos eles, Slow Food pode levar a cabo as súas moitas iniciativas para a tutela da biodiversidade alimentaria, para favorecer relacións directas e proveitosas entre produtores e consumidores, para sensibilizar sobre os asuntos máis urxentes vinculados co sistema alimentario mundial e para incrementar proxectos como os 10.000 hortos en África ou a Arca do Gusto .

O importe por afiliación individual son 50 euros anuais. Logo hai outras variantes como por exemplo por parella, menor de 30 anos …

Os socios de  Slow Food son as raíces da nosa rede, todos e cada un deles son un elemento esencial para o éxito do noso movemento.

Ao formar parte de  Slow Food:

  • Úneste a unha rede internacional de persoas con ideas afíns –desde campesiños mexicanos e chefs franceses ata pastores mongoles e profesores de Berkeley, pescadores vietnamitas ou produtores de viño italianos- todos xuntos traballando por uns obxectivos comúns.
  • Contribúes á boa marcha dos nosos proxectos –a súa cota de socio sostén os proxectos que realizamos en todo o mundo.
  • Xogas un papel tan activo como desexes – desde a organización de eventos e campañas ata a participación en actividades locais, nacionais e internacionais: os voluntarios dan vida ao movemento Slow

En Slow Food Compostela, algunhas das cousas que fixemos/facemos son:

  • Terra Madre Day Galicia. Cada 10 de decembro facemos unha comida onde os asistentes poden probar os produtos dos nosos produtores asociados e así degustar un produto bo, limpo e xusto.
  • Charlas e formación. Cursos de verán na USC, no seu Máster de Turismo, CultRural Santiago… e charlas alá onde nos chaman para contar o que facemos no noso día a día.
  • Asistencia a feiras e congresos. Fomos ao Terra Madre Salone del Gusto que se fixo o pasado setembro en Turín; Fórum da Coruña; Biocultura…
  • Damos moita visibilidade a aqueles asociados que son produtores. Moitas veces, por descoñecemento, o consumidor final/restaurador non sabe onde pode mercar determinadas cousas. Axudamos a todos eles a que establezan unha relación directa co produtor para que non se perdan as relacións persoais e para que haxa un maior coñecemento do produto que venden. Un dos nosos fortes é a rede entre produtores-restauración.
  • Rede de restaurantes Km 0. É un proxecto moi ambicioso do que moitos queren formar parte pero, ata o de agora, poucos o conseguiron. Os nosos requisitos son o de ter un 50-60% de produto de cercanía e comprado directamente a produtores. Desgraciadamente moi poucos o cumpren. Un dos lugares no que menos se fai, é en Santiago onde o principal cliente é o turista e claro, este non soe volver. Bastantes restaurantes ofrecen un produto da terra cando non é así; e cóbrano coma se o fora. Aquí temos unha loita moi grande.

 

  • Slow Food Compostela forma parte dunha agrupación de ámbito internacional, non si?

Slow  Food é unha organización global de base que se fundou en 1989 para previr a desaparición de culturas e tradicións alimentarias locais, para contrarrestar o auxe dos ritmos de vida acelerados e para combater o desinterese xeral sobre os alimentos que se consomen, a súa procedencia e a forma na que as nosas decisións alimentarias afectan o mundo que nos rodea.

Desde os seus comezos,  Slow  Food converteuse nun movemento mundial que hoxe involucra a millóns de persoas en máis de 160 países que traballan para asegurar que todo o mundo teña acceso a unha alimentación boa, limpa e xusta.

Os socios agrúpanse en seccións locais coñecidas co nome de Conviviums, coma Slow Food Compostela; son grupos autónomos que compoñen os alicerces da asociación.

Os Convivium fomentan a posta en valor da calidade e do pracer na vida cotiá reuníndose regularmente para compartir, en alegre convivencia, comidas e alimentos locais; xerar relacións con produtores; organizar catas, degustacións e seminarios; impulsar entre os cociñeiros o uso de alimentos locais e promocionar a educación do gusto nas escolas.

  • Vimos na vosa web o Caracol de Ouro 2019. En que consiste?

Pois un día navengando pola rede atopei esta iniciativa levada a cabo polo Convivium de Slow Food Araba-Álava, un dos conviviums máis importantes de Europa. Despois de conversar con Alberto López de Ipiña presidente desta Asociación  e ademais, Conselleiro Internacional de Slow Food, adoptamos a decisión de facer os premios «Caracol de Ouro» ao igual que os nosos compañeiros vascos. Parécenos unha moi boa iniciativa que ademais deberían adoitar máis Conviviums para así darlle máis forza a estes premios e recoñecer unha labor que hoxe en día é moi importante. O criterio principal consistirá na implicación, traballo e difusión da filosofía Slow Food na nosa comunidade. Poderá ser unha persoa, Asociación, Cooperativa …

A xente pode propoñer a súa candidatura, ou a de outra persoa que crea que o mereza, a través do noso mail: slowcompostela@gmail.com, ou a través das nosas redes sociais. A data límite será o 23 de outubro. Para a súa entrega faremos un evento e tamén un día de actividades relacionadas, como non podería ser doutra forma, coa nosa filosofía e no que poidan participar tódolos nosos socios.

O noso lema é: “Bo, Limpo e Xusto para todos”. Non podería definirse doutra forma.

Deja un comentario

Scroll al inicio
Ir al contenido