A Coruña en feminino na compañía de 6 mulleres

 

Comparto con vós hoxe o meu sentir cun primeiro traballo que realicei nesta nova etapa de Latexos de turismo, logo dunha profunda transformación, o  cal supuxo un reto persoal e profesional.

Persoal posto que por primeira vez creei contido para poñer voz a 6 mulleres (nada menos!). Entre elas, Rosalía de Castro. Como di Manuel Baleirón no seu libro «Sen Agardar a Ulises. Vida de Rosalía»  Podemos os demais contar a súa vida?. Profesional, porque tivemos que facer un traballo de calidade nun tempo récord. E os resultados acadados non terían sido posible sen os meus compañeiros de obra: Lidia de la Fuente e o equipo de Xoia, responsables finais do proxecto co Concello da Coruña.

Só podo manifestar palabras de gratitude cara os espíritos destas seis mulleres que nos acompañaron dende o primeiro instante, sobre todo, o de Elvira Bao! Unha grande descoñecida que me levou a conectar co máis profundo do meu ser.

Déixovos con elas, verdadeiras protagonistas desta historia de seis mulleres da “Coruña en feminino”.

Eu SON Elvira Bao unha de tantas mulleres de luz que pasamos á historia polo que viñemos deixar a este mundo nos momentos menos felices das nosas vidas… Seguro que xa vos teñen contado sobre o noso legado… ou non!

O sentir de felicidade das etapas luminosas foi o que nos mantivo vivas nas épocas escuras… A min e tamén a Concepción, a Rosalía, a Sofía, a Fanny e a María… que somos as escollidas para esta ruta que queremos compartir contigo…

Convidámoste a saber máis sobre nós visitando a cidade da Coruña. Como punto de inicio, podes achegarte á Praza de María Pita e dende alí guiaremoste coa axuda dunha aplicación móbil polos seguintes puntos:

  • Eu, Elvira, mestra desta cidade, falo dende o corazón da Praza de María Pita.
  • Eu, Fanny Garrido, escritora que firmei como Eulalia de Liáns (Ai, Liáns!!!) estou nas portas da Real Academia Galega na rúa Tabernas, 13. Xunto á casa museo da miña compañeira Emilia, Dona Emilia como lle din agora! Vouche contar algo: se tes tempo, non deixes de ir a Liáns en Oleiros… e visitar a contorna no Pazo de Lóngora. Xa me contarás logo…
  • Eu, Rosalía, estou onda o teatro que leva o meu nome na rúa Rego da Auga, 37. Bueno, Riego del Agua…
  • Eu, Sofía Casanova, escritora e correspondente de guerra, e nai de catro mulleres! Estou na Rúa San Andrés, 141, lugar onde nacín.
  • Eu, Concepción Arenal, escritora e visitadora de cárceres, estou nos Xardíns Méndez Núñez, na beira do mar… Falei moito sobre o vivir e sentir das mulleres na miña época…
  • Eu, María Barbeito, fun mestra na Escola da Guarda e atoparasme no nro. 21 da Praza de Pontevedra. Sabedes? Eu trouxen a reforma educativa a Galicia! Iso do Montessori… Lede con atención estas palabras miñas que rematan este artigo… e sentide!

“Y considerándonos una sola unidad, tengamos una sola voluntad para querer, discurramos como una sola inteligencia y palpitemos siempre como un solo corazón 💜.” 

  • Descarga no dispositivo móbil a App de AR chamada «A Coruña en feminino«. A ter en conta: o dispositivo debe soportar visualizar realidade aumentada e ter activadas as opcións de Google Maps.
  • Unha vez descargada a App visualizarás unhas primeiras imaxes
  • Pulsa en “Comezar roteiro” e a App levarate ata a cidade da Coruña onde se activarán varios puntos xeolocalizados
  • Recomendamos dar inicio na Praza de María Pita
  • Para comezar a información en cada punto debes apuntar co móbil cara o chan e darlle a «escoitar historia»

E van 20 anos… que naceu o Hotel Costa Vella

Hoxe vou contar unha historia que comezaba hai 20 anos… 

hotel-costa-vella

Foto: casa no ano 1998 do que é hoxe o ©Hotel Costa Vella

E van 20 anos… que emerxía un novo concepto de aloxamento en Compostela.  Pero isto do novo concepto daba igual… un gran visionario do sector do turismo de cuna hostaleira abría un pequeno hotel na zona vella desta cidade peregrina. Poucos cuartos… trece máis un…

E van 20 anos….  que José Antonio Liñares non dubidou nin por un intre do que lle dicía o seu corazón e apostou polo que sería o primeiro hotel con encanto de moitos en Santiago de Compostela. Esta pequena casa vella tiña un tesouro oculto… un corazón verde… un xardín histórico ao pé da antiga muralla do casco vello por unha das súas entradas: na Porta da Pena.

Xardín do ©Hotel Costa Vella hai 20 anos… (ano 2000)

E van 20 anos… daquela longa etapa traballando man a man con Toño… cantas horas aprendendo… con el descubrín a Paco Nadal e a Fernando Gallardo  e moito, moito, moito máis… Atopeime a min mesma e souben o que quería nesta vida.

E van 20 anos… de aprendizaxes que me marcarían como este consello que nos daba: se nos primeiros momentos de petición de reserva vos dan moitas voltas (por escribilo de xeito correcto), facede o posible para que non reserven porque se veñen darán problemas ata que saian pola porta… Non fallaba… Que consello tan sabio! Vixente a día de hoxe!

E van 20 anos…! Grazas Toño, José Antonio, Liñares… fuches o meu mentor e  grazas á túa profesionalidade e calidade humana puiden ir medrando no mundo do turismo e ser o que hoxe son… ou non son… (que responsabilidade!)

E van 20 anos… que este lugar acolle a todas as xentes… sen categorizar, sen diferenciar… ACOLLE esa gran familia do Hotel Costa Vella: Toño, Ana, Rober, as Marías, Susana…  Un capitán coñecedor da resiliencia inda sen estar o concepto de moda que co paso do tempo soubo ir adaptando o seu barco… e que sen dúbida, saberá reinventarse e quen sabe… igual crear outro concepto acorde a este novo paradigma no que estamos entrando… E quen sabe… Igual dentro doutros 20 anos volveremos a escribir… “E van 20 anos…”

Moito ánimo a tod@s os compañeir@s do sector, o meu corazón 💛 latexa con vós

 


Saborea Padrón e vive Padrón!

Un ano máis (e xa van 7), chega o Saborea Padrón entre o 6 e o 15 de outubro (día 12 incluído).

Petiscos, gastronomía en miniatura para degustar os mellores produtos da terra

saborea-padron

 

Que locais participan?

Saborea Padrón. 11 locais, 11 xeitos de saborear Padrón: Café Bar As Camelias (Delicias do Camiño), Cafetería Alfolí (A tosta do Camiño), Cafetería Bámbola (O mirador do Camiño), Café Cultural Airiños (A cuncheira), Café Século XX (Traslatio), Central Perk (Pasiño a pasiño), O Alpendre (A Quintana), O Secreto (A Cunca do Peregrino), O Secreto do Viño (Pan e viño axudan a facer o Camiño), Retro Visor (Rolling Stone) e Ruta Xacobea (HIC FUIT).

Que actividades haberá?

Mais non soamente de comer se trata, senón que tamén haberá actividades, varias delas de balde. O domingo 8 de outubro haberá unha visita guiada ao Convento de Herbón (con reserva previa) e o sábado 14 ás 17.00 h. unha andaina etnobotánica na que unha bióloga nos explicará os beneficios que teñen para a nosa saúde as plantas que medran ás beiras dos camiños. Tamén é precisa reserva previa. Outra actividade que se levará a cabo, é unha andaina de máis de 20 km. para coñecer o Camiño Sagrado, Pedronía. O día 12 de outubro, e cun prezo que vai desde o 33 € dependendo dos servizos reservados.

E cales son os premios?

Saborea Padrón é un concurso, e como tal, haberá premios para o local gañador de entre os participantes que será escollido polo voto das persoas que vaian degustar os petiscos aos locais. Os usuarios deberán coller un pasaporte e poñer o selo do local onde coma a tapa, e depositalos ao final do concurso nas urnas que hai nos establecementos participantes.

Os usuarios dos pasaportes que teñan 3 selos ou máis, entrarán no sorteo de varios vales económicos (4 en total) en nun premio especial que consiste nunha estancia no Hotel Semáforo de Fisterra ou no regalo dunha caixa de experiencias tipo Plan B ou Dakota Box.

Como podo participar?

Para o concurso o pasaporte pódese recoller na Oficina de Turismo de Padrón, ou nos locais participantes; tamén o podes descargar neste enlace. Para entrar no sorteo dos premios, selar nun mínimo de 3 locais. E por suposto, pagar 2€ por cada tapa que pidas!

Moi sinxelo, non sí? Agardámoste saboreando Padrón!